O CCA Carballo pon en marcha a segunda edición de «Truco ou Trato?», unha campaña de Samaín na que participan 41 comercios asociados e que se desenvolverá a partir do 15 de outubro.
Nesta edición, os escaparates converteranse nun xogo de observación no que as persoas participantes deberán localizar diferentes figuras relacionadas co Samaín, como cabazas, sombreiros, vasoiras, landras, morcegos, potes e pantasmas. Cada figura atopada permitirá conseguir un selo na cartolina da campaña e avanzar nun percorrido polos establecementos participantes.
Para facilitar o percorrido, cada boleto de participación contará cun código QR que permitirá acceder ao mapa cos establecementos adheridos. As cartolinas poderán conseguirse inicialmente ao realizar unha compra nun dos comercios participantes.
As persoas que completen as cartolinas poderán participar no sorteo de seis cheques de 50 €, que se celebrará o 30 de outubro, para gastar en establecementos de hostalaría e alimentación do CCA (Adega O´Lagar, Asador Rio Sil, Cafetería A Nova Ferradora, Cafetería Mercado, Ceibo Café, Confitería San Luis, Dobbo’s Cookies, Gumi Golosinas y Regalos, Maloserá Carballo, Mmmm! Xeados, Panadaría Forno Novo, Parrillada A Lareira, Pizza Troppo, Restaurante Albaroque, Restaurante Pementa Rosa,Taberna O Lambón e Zuccaro). Ademais, durante esa xornada, quen se achegue disfrazado poderá conseguir entradas de cine para dúas persoas e xeados de balde.
A campaña está promovida polo CCA Carballo e conta co apoio e cofinanciamento da Xunta de Galicia, a Deputación da Coruña e o Concello de Carballo.
