O amor por unha nai non se mide, pero o vindeiro 4 de maio podes demostralo cun agasallo que tamén apoie ao comercio da túa vila. Se hai uns meses tocaba agasallar aos pais, agora é a quenda das nais. O Centro Comercial Aberto (CCA) de Carballo presenta unha nova campaña para celebrar o Día da Nai, coa que busca ademais premiar a fidelidade da clientela e continuar dinamizando o tecido comercial local.

A iniciativa mantén a fórmula que tan boa acollida tivo na campaña do Día do Pai: un sorteo de 3 cheques de 100 euros cada un, para gastar nos establecementos asociados ao CCA Carballo.

Todas as persoas que realicen as súas compras nos 38 comercios adheridos desde este venres 25 e ata o sábado 3 poderán participar no sorteo, que se celebrará o venres 9 de maio ás 16:00 horas e será retransmitido en directo a través da conta de Instagram do CCA Carballo (@ccacarballo), facilitando así a participación e transparencia de todo o proceso.

Desde a entidade lembran que, ademais de gañar interesantes premios, consumir no comercio local ten importantes beneficios sociais, ambientais e económicos. Cada xesto conta, e un simple agasallo pode converterse nun acto de apoio a todo un sector. Neste senso, a nova presidenta do CCA, Silvana Rama Corral, anima á veciñanza a implicarse nesta nova campaña por ser “unha ocasión perfecta para amosarlles ás nosas nais o moito que significan para nós, e unha aposta máis pola nosa economía, pola vida comercial nas rúas, polo emprego local e pola identidade do noso pobo.”

Esta campaña está promovida polo Centro Comercial Aberto de Carballo, e conta co co-financiamento da Xunta de Galicia, a Deputación da Coruña e o Concello de Carballo.

Establecementos participantes 

A Saia da Carolina, Akira, Aloe Herboristería, Atelier, Atmósfera Sport, Break Time, Buy&Sell, Calvelo Regalo, Calzados Susa, Cenor, Comercial Queijo, Confecciones San Juan, Cristina Morgade, D&A Complementos, Dequip, Doces Soños, donClip.es, DV Carballo, Ekaté, Emiliano Moda, Federópticos Nicolás, Florería Taibo, Florida Centro Joya, Informática Valem, Joyería Calvelo Seoane, Lencería Mª José, Maker Store, Maluca Lobe, Mmmm! Xeados, Moda Suárez, Muebles Fuentes, Óptica Enríquez, Purificación Lema Centro Belleza, Rafa Vila Joyerías, Teirón, Todo Lar, Zapatillería Isabel e  Zocas.