O Centro Comercial Aberto (CCA) recupera este verán unha das súas iniciativas máis lembradas polos clientes, adaptándoa aos novos hábitos de consumo e comunicación. Baixo o nome de “O Prezo Xusto”, a entidade lanza unha campaña que se desenvolverá ao longo de todo o mes de xullo e que combinará entretemento, participación e premios para seguir impulsando a actividade comercial e económica da vila.
A iniciativa, que estará vixente do luns 6 ao venres 31 de xullo, nace co dobre obxectivo de dinamizar as vendas durante a temporada estival e recompensar a confianza dos consumidores que apostan polo comercio de proximidade no seu día a día. Nesta nova edición, a campaña dá un paso máis e fai un guiño ás novas tecnoloxías, desenvolvéndose exclusivamente a través da canle de Instagram do CCA. Con esta fórmula, a entidade pretende tamén reforzar a súa presenza dixital, incrementar o número de seguidores e fomentar unha maior interacción nas redes sociais.
O funcionamento será moi sinxelo. Cada luns publicarase en Instagram a imaxe dun escaparate virtual composto por doce artigos procedentes dos comercios asociados. A partir dese momento, os participantes terán ata o venres ás 20.00 horas para adiviñar o prezo xusto do conxunto dos produtos.
Cada semana presentarase un novo escaparate e, os venres ás 21.00 horas, o CCA dará a coñecer o importe exacto do escaparate, así como o prezo individual de cada un dos artigos que o compoñen. Resultará gañadora a primeira persoa que acerte o prezo exacto ou, no seu defecto, quen máis se aproxime sen superalo.
Cada un dos catro gañadores recibirá un cheque agasallo de 50 euros para consumir nos establecementos asociados ao CCA, polo que a campaña repartirá un total de 200 euros en premios ao longo do mes.
Para participar só será necesario seguir a conta de Instagram do CCA, indicar “gústame” na publicación correspondente, etiquetar a unha persoa nos comentarios e escribir a súa proposta co prezo xusto do escaparate.
Como requisito para facer efectivo o premio, a persoa gañadora deberá presentar dous tickets de compra realizados en establecementos asociados ao CCA, datados na mesma semana da participación. Deste xeito, a campaña non só premia aos participantes, senón que incentiva directamente as compras no comercio local.
Desde o CCA animan á veciñanza e aos visitantes a sumarse a esta proposta estival, pensada para ofrecer un momento de diversión ao tempo que se pon en valor a ampla oferta comercial da vila. “O Prezo Xusto” convértese así nun xogo participativo no que a intuición pode ter recompensa e no que, unha vez máis, mercar no comercio local ten premio. A xogar…….!!
