A nova identidade, baseada na pegada dactilar como símbolo de pertenza, luce xa nos escaparates dos 93 comercios adheridos

O Centro Comercial Aberto (CCA) de Carballo dá un novo paso adiante coa presentación da súa nova imaxe corporativa, que xa está presente en todos os escaparates dos 93 comercios asociados cos que conta na actualidade. O obxectivo desta iniciativa é reforzar a identidade visual da entidade e facilitar que a veciñanza identifique de forma rápida e sinxela os establecementos adheridos.

A pegada dactilar do CCA: unha identidade única

O elemento central da nova imaxe é unha pegada dactilar, que representa algo único, propio e identitario. Dentro da pegada, intégrase o símbolo identificativo do CCA, unindo visualmente o concepto de pertenza e identidade. A mensaxe é clara: “SON CARBALLO. SON CCA.”

O comercio fai pobo. É parte destacada da súa identidade e parte esencial da nosa comunidade. O novo elemento visual pretende converterse nun símbolo recoñecible para a veciñanza e nunha declaración de intencións para os comercios asociados, que queren destacar o seu compromiso coa comunidade e coa súa contorna, reforzando así o papel esencial do comercio na comunidade local. “Pertencer ao CCA significa apoiar Carballo, o seu comercio e o seu futuro”, destacou o presidente Carlos Cousillas.

A campaña inclúe o lanzamento de vinilos adherentes que decorarán os escaparates dos comercios, acompañados de tótems colocados en puntos estratéxicos da vila para maximizar o impacto visual e a súa difusión.

O CCA de Carballo reafirma con esta iniciativa o seu compromiso co comercio local, traballando para que os establecementos asociados sexan un motor económico e social do noso pobo. Esta campaña pretende ser unha aposta pola modernización, a visibilidade e a conexión directa cos valores da nosa comunidade e destaca a importancia do comercio como parte fundamental da identidade e do futuro de Carballo.