O CCA Carballo fixo entrega este martes do terceiro cheque agasallo de 50 euros da campaña “O Prezo Xusto”, unha iniciativa que continúa a espertar un gran interese entre a clientela e os seguidores das redes sociais da entidade.
Nesta ocasión, o premio volveu viaxar ata a parroquia carballesa de Razo, que parece confirmar que o sol e o mar son unha excelente combinación á hora de afinar a puntería e calcular o valor dos escaparates da campaña.
A terceira gañadora foi María Canedo Velo, quen realizou unha estimación de 1.263,95 euros, converténdose na participante que máis se aproximou ao prezo real do escaparate, valorado en 1.389,80 euros.
Desde o CCA Carballo queremos trasladar os nosos parabéns á gañadora e agradecer, unha semana máis, a extraordinaria participación da veciñanza. “O Prezo Xusto” naceu co obxectivo de dinamizar o comercio local, dar visibilidade aos produtos dos establecementos asociados e reforzar a comunidade de seguidores do CCA Carballo en Instagram, convertendo cada escaparate nun reto divertido no que a participación ten premio.
A campaña entra agora na súa recta final. Desde o pasado luns 27 de xullo xa está publicado en Instagram o cuarto e derradeiro escaparate, no que as persoas participantes aínda teñen unha última oportunidade para conseguir un cheque agasallo de 50 euros, co que completamos un total de 200€ en cheques-compra.
Para participar só é necesario seguir a conta de Instagram do CCA Carballo, darlle “Gústame” á publicación, etiquetar a outra persoa e indicar nos comentarios cal se considera que é o prezo total do escaparate. E para poder recibir o premio, a persoa gañadora deberá presentar os tickets de dúas compras realizadas nesa mesma semana nalgún dos establecementos asociados. Moita sorte a todos/as!
