• Ademais dos 16 expositores que sacarán os seus produtos á rúa, preto dunha vintena de  establecementos sumaranse á feira desde os seus locais
• Durante toda a fin de semana haberá actividades complementarias para toda a familia

Unha nova edición do MercaEdillo xa está á volta da esquina. E, nesta ocasión, chegará cos mellores descontos do verán, a calidade de sempre e importantes e animadas novidades. Será do 6 ao 8 de setembro na zona do Rego da Balsa.

Xunto a Axober, encargada de organizar un ano máis a Feira de Vehículos de Ocasión Berocasión, e coa colaboración da Deputación da Coruña e o Concello de Carballo, o CCA converterá a vila carballesa nun gran escaparate comercial ao aire libre. Téxtil, calzado, moda infantil, segunda man, xoguetería, alimentación conforman a ampla oferta de produtos que este ano se distribuirán nos 16 stands participantes, situados nunha área de estacionamento de 1000 metros cadrados de superficie entre as rúas Pontevedra e Ourense, nos que os/as visitantes poderán atopar descontos moi apetecibles de ata o 80%.

Pero este ano o mercadillo de verán contará con moitos máis comercios adheridos. Ademais das tradicionais carpas, nesta edición sumaranse preto dunha vintena de establecementos desde os seus locais habituais. Establecementos asociados á entidade e outros que non o son, uniranse ao evento para transformar Carballo nun gran centro comercial aberto á veciñanza durante toda a fin de semana. Deste xeito, preténdese estender a iniciativa á participación de todo o comercio local para integrar aqueles locais que, por falta de persoal e/ou recursos, lles resulta imposible desprazarse ao recinto feiral, o que redundará en beneficio dos consumidores/as que atoparán unha maior diversidade de produtos, comercios e descontos.  

Animación de rúa

A música, a gastronomía e actividades infantís serán as outras grandes protagonistas desta edición cargada de ocio e diversión para toda a familia duranmte toda a fin de semana. Toma nota!

Venres 6

19.00 – 20.30 horas: Cookies show con Break Time. Showcooking gratuíto para que os peques da casa aprendan a elaborar a súa propia galleta. Aforo limitado! Zona MercaEdillo

Sábado 7 e domingo 8

• De 11.00 a 14.00 e de 17.00 a 19.00 horas: Animación infantil con tatuaxes, pintacaras, globoflexia e xogos tradicionais. Tamén haberá música e baile. Zona Balneario
• De 13.30 a 15.30 horas: Sesións vermú. O día 7, a cargo do grupo O Tren Da Unha. E o domingo 8, con La Duendeneta. Zona Balneario