Xa están abertas as inscricións para participar no I peKecrossfit Inclusivo, unha actividade pioneira que combina deporte, inclusión, solidariedade e diversión para comezar o ano con enerxía e con valores. O evento, impulsado polo CCA e patrocinado pola empresa de construción carballesa Vázquez y Reino en beneficio da asociación Un paso máis, celebrarase o domingo 4 de xaneiro en horario de mañá e tarde na carpa situada na Praza do Concello.
O circuíto, pensado especialmente para nenos e nenas menores de 12 anos, contará cunha ampla variedade de estacións adaptadas, con probas de equilibrio, obstáculos, forza, axilidade, saltos e outras actividades deseñadas para garantir unha experiencia segura, accesible, divertida e inclusiva.
Se o tempo o permite, a entidade beneficiaria tamén sumará ao programa varias propostas de sensibilización, como fútbol con balóns sonoros, retos adaptados para persoas con mobilidade reducida e xogos cooperativos, reforzando o carácter inclusivo da xornada.
A actividade desenvolverase en dobre horario, de 12:00 a 14:00 h e de 17:00 a 19:30 h, permitindo a participación de forma ordeada e escalonada ao longo de todo o día.
Inscricións abertas ata o 30 de decembro
A inscrición, dispoñible desde hoxe 15 e ata o 30 de decembro en carballo.gal , ten un prezo simbólico de 3 €/persoa, que se destinarán integramente aos programas de inclusión da entidade “Un paso máis”. As prazas, que son limitadas (200), iranse cubrindo por orde de inscrición.
O importe aboarase na propia carpa antes de comezar a proba, onde cada neno e nena recibirá ademais un peto conmemorativo desta primeira edición. E as 50 primeiras inscricións levarán, como agasallo adicional, unha entrada dobre para o cine.
Quendas de participación
Para garantir unha maior participación e evitar agardas, establécense quendas distribuídas ao longo da mañá e da tarde. Cada inicio de quenda contará cun espazo reservado de 15 minutos para participantes con necesidades de apoio e acompañamento, co obxectivo de ofrecer ritmos máis flexibles e unha adaptación axeitada ás súas necesidades.
Horarios de mañá:
- 12.00–12.15 h (necesidades de apoio)
- 12.15–13.00 h
- 13.00–13.15 h (necesidades de apoio)
- 13.15–14.00 h
Horarios de tarde:
- 17.00–17.15 h (necesidades de apoio)
- 17.15–18.15 h
- 18.15–18.30 h (necesidades de apoio)
- 18.30 a 19.30 h
Se tes peques na casa, inscríbeos xa e achégate con eles/as a participar nesta proposta que converterá a Praza do Concello nun pequeno escenario de deporte, superación e convivencia.
O I peKecrossfit Inclusivo é unha iniciativa impulsada polo CCA Carballo, patrocinada por Vázquez y Reino, e que conta coa colaboración do Concello de Carballo e Gadis.
